தட்டப்பயறு மசாலா

தேவையான பொருட்கள்:

தட்டப்பயறு - அரை கப்
வெங்காயம் - ஒன்று
தக்காளி - 2
பச்சை மிளகாய் - ஒன்று
புளி பேஸ்ட் - ஒரு தேக்கரண்டி
மிளகாய்த் தூள் - ஒரு தேக்கரண்டி
கரம் மசாலாத் தூள் - கால் தேக்கரண்டி
மஞ்சள் தூள் - கால் தேக்கரண்டி
பட்டை - 2 சிறிய துண்டுகள்
கிராம்பு - 2
சோம்பு - கால் தேக்கரண்டி
நெய் - ஒரு தேக்கரண்டி
எண்ணெய் - 4 தேக்கரண்டி
உப்பு - தேவையான அளவு

   செய்முறை: 

பயறை 2 மணி நேரம் ஊற வைக்கவும். ஊறியதும் அத்துடன் உப்பு சேர்த்து குக்கரில் போட்டு வேக வைத்துக் கொள்ளவும். வேக‌ வைத்த‌ தண்ணீரைத் தனியாக வடிகட்டி எடுத்து வைக்கவும். தக்காளியை பொடியாக நறுக்கி விழுதாக அரைக்கவும்.

வாணலியில் எண்ணெய் விட்டு சூடானதும் பட்டை, கிராம்பு, சோம்பு போட்டு தாளித்து, பொடியாக நறுக்கிய வெங்காயம், கீறிய பச்சை மிளகாய் போட்டு வதக்கவும்.

வதங்கியதும் தக்காளி விழுது, மிளகாய்த் தூள், மஞ்சள் தூள் மற்றும் புளி பேஸ்ட் போட்டு தண்ணீர் வற்றும் வரை வதக்கவும்.

பிறகு வேக வைத்த பயறைச் சேர்த்து, பயறு வேக‌ வைத்த‌ தண்ணீரையும் ஊற்றி, சிறிது உப்பு சேர்த்து கெட்டியாகும் வரை கொதிக்கவிடவும். (பயறு வேக வைக்கும் போதும் உப்பு சேர்த்திருப்பதால், உப்பின் அளவை சரிபார்த்துச் சேர்க்கவும்).

கொதித்ததும் கரம் மசாலாத் தூள் மற்றும் நெய் சேர்த்து, கொத்தமல்லித் தழை தூவி கிளறிவிட்டு இறக்கவும். (கரம் மசாலா சேர்த்ததும் வரும் மணம் மிகவும் நன்றாக இருக்கும்).

சுவையான தட்ட‌ப்பயறு மசாலா ரெடி.